شعر تازه   

شعر جدیدی از برادر بزرگوارم متخلص به حباب برایتان ارمغان دارم ،امیدوارم مقبول طبع صاحب نظر عزیزان قرار گیرد:

         ترک گناه

   وای بر آن همزه و لمزه

ایشلری زشت و سوزلری بیمزه

مفته ییه هرزه دولانا گزه                                   

عیب توتا هر گلنه بیهده

یحسب انّ ماله اخلده

 

قالّاق ایده هر گیچنه کوچه ده

اوتانمیا اوز عملیندن گیده

هرگون ایشی میکده ده عربده                                    

صرف ایلیه عمرینی بی فایده

یحسب انّ ماله اخلده

  

دادلی گلوب یاقلی سوموک آغزنا

که مرده ریکدن یتیشوبدور اونا

کرکس اولان لاشیه ایستر قونا

آج ایتلرون قالار گوزی جیفه ده

  یحسب انّ ماله اخلده

 

 اولدی بری قالدی کلان مرده ریک

اونی تصاحب ایلدی بی شریک

مفته یدی اولدی قارین مثل خیک

کوک دونقوز آرتیرماز مگر مفسده

یحسب انّ ماله اخلده

 

غافل ایدوبدور اونی مال آی بالا

قویوب آداملیق جرگه سیندن دالا

خشلمز اما قویاجاقدور قالا

کیم آپاروب ثروتینی مرقده

یحسب انّ ماله اخلده

 

آخر اولومدور بو جهان ترک اولور

یازدا آچان غونچا پایزدا سولور

ایّوب اولا کاسۀ صبری دولار

خضر دا اولسا گرک آخر گده

یحسب انّ ماله اخلده

       

آلّاه الی وار قلم غیبی وار

هر کسه نون دنیادا بیر عیبی وار

هر شبابون قالسا دیری شیبی وار

حسابچون یولّاناجاق مخلده

یحسب انّ ماله اخلده

 

 اولمک همان پالتارووی سویالّار

یوماقچون تخته اوسته قویالّار

عملون ایله قبروه قویالّار

دای سنه یوخ واریوخوندان فایده

یحسب انّ ماله اخلده

 

 یوم گوزوی قبروی سال یادوه

شر کیتابین چاپ ایلمه آدوه

آنجاق عملدور یتیشن دادوه

نعشوی گر تاپشرالار مشهده

یحسب انّ ماله اخلده

  

آلّاها باخ ترک ایله هر پیس ایشی

نا کشیلیک بسدور آدوندور کیشی

فوته گیدوبدور عمورون آتمیشی

آتما چوله بو قالانین آی دده

یحسب انّ ماله اخلده

 

بودنیانون یوخ بیریندن حیاسی

یتیم دور یوخ آتاسی آناسی

بیر گوزده دوربیگانه آشناسی

قانماز رسوم و قانون و قاعده

یحسب انّ ماله اخلده

 

 

 

 

لینک
چهارشنبه ۳٠ اردیبهشت ،۱۳۸۸ - میرهادی خلخالی زاویه